Johann Christian (Q527436)

Vnd kame die gnädigste sämbtliche herrschafft nach geha{l}tener betstunde herunter in die kirche, vnd traten an der rechten seyten des altars in den chu{r}fürstl‹ichen› stuhl; Die beyden täufflinge aber stelleten sich vor dem altar, vnd ward gesungen Christ unser Herr zum Jordan kam etc. Hierauff hielte m‹agister› Green vor dem altar eine kurtze {ser}mon, vnd wie solche geendiget, fragte er die beyden täufflingen wegen ihres glaubens, a{uff} das der gnädigsten herrschafft vnd der gemeine kund würde, wie weit sie in der erkentnüß Gottes vnd der christlichen lehre kommen wären. Vnd sind die fragen in der schloß capelle beygeleget worden. Nach diesem allen traten die chur vnd fürstl‹ichen› personen nebenst denen andern tauffzeugen zum tauffstein, vnd ward die tauffe verrichtet Darauff die gnädigste herrschafft haußen bey dem altar stehen blieben, biß man d{en} gesang, Nun laßet uns Gott den Herrn etc. nebenst der collect vnd seegen gesungen vnd mit dem gesang Sey lob vnd ehr etc. diesen gantzen christlichen actum beschlossen hatt. Gott erhalte die getaufften beyden in diesem seinen heil‹igen› gnadenbund ewiglich, vnd mache sie immer reicher in seiner heilsamen erkentnüß, beständig im glauben, fest in der lebendigen hoffnung, vnd fruchtbar in allen guhten werken zu seinen heiligen eh{ren[?]} vnd ihrem ewigen heil. Umb Christi J‹esu› willen, der wird sie volbereiten stärk{en …} gründen, Ihm sey ehr und preiß von ewigkeit zu ewigkeit amen.